John 21
ព្រះយេស៊ូបង្ហាញខ្លួនដល់សិស្សប្រាំពីរនាក់
1ក្រោយពីហេតុការណ៍ទាំងនេះព្រះយេស៊ូបានបង្ហាញខ្លួនឲ្យពួកសិស្សរបស់ព្រះអង្គឃើញម្ដងទៀតនៅបឹងទីបេរាសគឺព្រះអង្គបានបង្ហាញឲ្យឃើញបែបយ៉ាងនេះ 2គឺពេលលោកស៊ីម៉ូនពេត្រុសលោកថូម៉ាសដែលហៅថាឌីឌីមលោកណាថាណែលដែលមកពីភូមិកាណាស្រុកកាលីឡេកូនប្រុសរបស់លោកសេបេដេនិងពួកសិស្សរបស់ព្រះអង្គពីរនាក់ទៀតបាននៅជាមួយគ្នា 3ហើយនៅពេលនោះលោកស៊ីម៉ូនពេត្រុសក៏ប្រាប់ពួកគេថា៖ «ខ្ញុំទៅនេសាទត្រី» ពួកគេក៏ឆ្លើយថា៖ «យើងទៅជាមួយដែរ» ពួកគេក៏ចុះទូកទៅប៉ុន្តែនៅយប់នោះពួកគេចាប់មិនបានអ្វីសោះ។ 4ពេលព្រឹកឡើងព្រះយេស៊ូបានឈរនៅមាត់បឹងប៉ុន្តែពួកសិស្សមិនស្គាល់ថានោះជាព្រះយេស៊ូទេ។ 5ព្រះអង្គមានបន្ទូលទៅពួកគេថា៖ «កូនអើយ! តើមានបានត្រីដែរឬទេ?» ពួកគេទូលឆ្លើយថា៖ «គ្មានទេ!» 6ដូច្នេះព្រះអង្គក៏មានបន្ទូលទៅពួកគេថា៖ «ចូរទម្លាក់អួនទៅខាងស្ដាំទូកនោះទើបចាប់ត្រីបាន!» ដូច្នេះពួកគេក៏ធ្វើតាមប៉ុន្តែទាញមកវិញមិនរួចទេព្រោះជាប់ត្រីច្រើនពេក។ 7ពេលនោះសិស្សម្នាក់ដែលព្រះយេស៊ូស្រលាញ់គាត់និយាយទៅលោកពេត្រុសថា៖ «នោះជាព្រះអម្ចាស់ទេតើ!» ពេលលោកស៊ីម៉ូនពេត្រុសបានឮថាជាព្រះអម្ចាស់គាត់ក៏យកអាវក្រៅដណ្ដប់ខ្លួនលោតចុះទៅក្នុងបឹងព្រោះគាត់នៅខ្លួនទទេ 8រីឯពួកសិស្សផ្សេងទៀតបានអុំទូកអូសអួនជាប់ត្រីនោះមកច្រាំងដ្បិតនៅមិនឆ្ងាយទេគឺប្រហែលមួយរយម៉ែត្រប៉ុណ្ណោះ។ 9ពេលពួកគេបានឡើងដល់ដីគោកពួកគេក៏ឃើញនំប៉័ងព្រមទាំងរងើកភ្លើងដែលមានត្រីអាំងលើនោះ។ 10ព្រះយេស៊ូមានបន្ទូលទៅពួកគេថា៖ «ចូរយកត្រីខ្លះដែលទើបនឹងចាប់បាននោះមក!» 11លោកស៊ីម៉ូនពេត្រុសក៏ឡើងមកទាញអួនដែលមានត្រីធំៗពេញដាក់លើគោកគឺមានត្រីមួយរយហាសិបបីក្បាលហើយទោះបីច្រើនយ៉ាងនេះក៏ដោយក៏អួនមិនធ្លាយដែរ។ 12ព្រះយេស៊ូមានបន្ទូលទៅពួកគេថា៖ «ចូរមកបរិភោគចុះ» ហើយគ្មានសិស្សណាម្នាក់ហ៊ានសួរព្រះអង្គថាតើលោកជាអ្នកណាទេ? ព្រោះពួកគេដឹងហើយថានោះជាព្រះអម្ចាស់។ 13ព្រះយេស៊ូក៏យាងទៅយកនំប៉័ងនិងត្រីប្រទានឲ្យពួកគេ។ 14នេះជាលើកទីបីហើយដែលព្រះយេស៊ូបានបង្ហាញខ្លួនឲ្យពួកសិស្សឃើញក្រោយពីព្រះអង្គរស់ពីការសោយទិវង្គតឡើងវិញ។ព្រះយេស៊ូជំរុញលោកពេត្រុស
15ពេលនោះក្រោយពេលពួកគេបរិភោគរួចព្រះយេស៊ូមានបន្ទូលទៅលោកស៊ីម៉ូនពេត្រុសថា៖ «ស៊ីម៉ូនកូនលោកយ៉ូហានអើយ! តើអ្នកស្រលាញ់ខ្ញុំជាងពួកអ្នកទាំងនេះដែរឬទេ?» គាត់ទូលឆ្លើយថា៖ «បាទព្រះអម្ចាស់! ព្រះអង្គបានដឹងហើយថាខ្ញុំស្រលាញ់ព្រះអង្គ»។ ព្រះយេស៊ូមានបន្ទូលទៅគាត់វិញថា៖ «ចូរឲ្យចំណីដល់កូនចៀមរបស់ខ្ញុំផង!» 16ព្រះអង្គមានបន្ទូលទៅគាត់ជាលើកទីពីរទៀតថា៖ «ស៊ីម៉ូនកូនលោកយ៉ូហានអើយ! តើអ្នកស្រលាញ់ខ្ញុំដែរឬទេ?» គាត់ទូលឆ្លើយថា៖ «បាទព្រះអម្ចាស់! ព្រះអង្គបានដឹងហើយថាខ្ញុំស្រលាញ់ព្រះអង្គ»។ ព្រះអង្គមានបន្ទូលទៅគាត់វិញថា៖ «ចូរថែទាំចៀមរបស់ខ្ញុំផង!» 17ព្រះអង្គមានបន្ទូលទៅគាត់ជាលើកទីបីថា៖ «ស៊ីម៉ូនកូនលោកយ៉ូហានអើយ! តើអ្នកស្រលាញ់ខ្ញុំដែរឬទេ?» លោកពេត្រុសបានព្រួយចិត្ដព្រោះព្រះអង្គមានបន្ទូលសួរគាត់ដល់ទៅបីដងថាតើអ្នកស្រលាញ់ខ្ញុំដែរឬទេ? ដូច្នេះគាត់ទូលឆ្លើយទៅព្រះអង្គថា៖ «ព្រះអម្ចាស់អើយ! ព្រះអង្គដឹងគ្រប់ការទាំងអស់គឺព្រះអង្គបានដឹងហើយថាខ្ញុំស្រលាញ់ព្រះអង្គ»។ ព្រះយេស៊ូមានបន្ទូលទៅគាត់ថា៖ «ចូរឲ្យចំណីដល់ចៀមរបស់ខ្ញុំផង! 18ខ្ញុំប្រាប់អ្នកជាពិតប្រាកដថាពេលអ្នកនៅក្មេងអ្នកស្លៀកពាក់ខ្លួនឯងហើយទៅណាតាមចិត្ដប៉ុន្តែពេលអ្នកចាស់អ្នកនឹងសន្ធឹងដៃរបស់អ្នកហើយម្នាក់ទៀតនឹងស្លៀកពាក់ឲ្យអ្នករួចនាំអ្នកទៅកន្លែងដែលអ្នកមិនចង់ទៅ»។ 19ព្រះអង្គមានបន្ទូលដូច្នេះគឺបង្ហាញអំពីរបៀបដែលគាត់នឹងត្រូវស្លាប់ដើម្បីថ្វាយសិរីរុងរឿងដល់ព្រះជាម្ចាស់។ កាលព្រះអង្គមានបន្ទូលដូច្នោះហើយព្រះអង្គក៏ប្រាប់គាត់ថា៖ «ចូរមកតាមខ្ញុំចុះ!»។កំណែដំណឹងមិនពិត
20ពេលលោកពេត្រុសងាកក្រោយក៏ឃើញសិស្សម្នាក់ដែលព្រះយេស៊ូស្រលាញ់នោះកំពុងដើរតាមដែរ។ សិស្សនោះហើយដែលបានផ្អែកលើព្រះឧិរារបស់ព្រះអង្គហើយបានទូលសួរព្រះអង្គនៅក្នុងពេលអាហារល្ងាចថាព្រះអម្ចាស់អើយ! តើអ្នកក្បត់ព្រះអង្គជានរណា? 21ពេលលោកពេត្រុសឃើញអ្នកនោះក៏ទូលសួរព្រះយេស៊ូថា៖ «ព្រះអម្ចាស់អើយ! តើអ្នកនោះយ៉ាងដូចម្ដេចដែរ?» 22ព្រះយេស៊ូមានបន្ទូលទៅគាត់ថា៖ «បើខ្ញុំចង់ឲ្យអ្នកនោះនៅរស់រហូតដល់ខ្ញុំមកវិញតើទាក់ទងអ្វីនឹងអ្នក? ចូរអ្នកមកតាមខ្ញុំចុះ!» 23ដូច្នេះពាក្យនោះក៏លេចឮក្នុងចំណោមពួកបងប្អូនថាសិស្សនោះមិនស្លាប់ទេប៉ុន្តែព្រះយេស៊ូមិនបានមានបន្ទូលថាសិស្សនោះមិនស្លាប់ទេគឺគ្រាន់តែមានបន្ទូលប៉ុណ្ណោះថា៖ «បើខ្ញុំចង់ឲ្យអ្នកនោះនៅរស់រហូតដល់ខ្ញុំមកវិញតើទាក់ទងអ្វីនឹងអ្នក»។សេចក្ដីបញ្ចប់
24សិស្សនោះហើយដែលបានធ្វើបន្ទាល់ពីសេចក្ដីទាំងនេះហើយបានកត់ត្រារឿងទាំងនេះទុករីឯយើងក៏ដឹងថាសេចក្ដីបន្ទាល់របស់គាត់ជាការពិត។ 25មានការច្រើនទៀតដែលព្រះយេស៊ូបានធ្វើហើយបើកត់ត្រាឲ្យបានល្អិតល្អន់នោះខ្ញុំយល់ឃើញថាពិភពលោកនេះគ្មានកន្លែងល្មមសម្រាប់ទុកសៀវភៅទាំងនោះទេ។
Copyright information for
KhmKCB